ឯកឧត្ដម នៃ ចារី អភិបាលរងខេត្តកណ្ដាល និងលោកជំទាវ បាននាំយក ទេយ្យទាន បច្ច័យទេយ្យវត្ថុ គ្រឿងបរិក្ខារ និងទៀនចំណាំព្រះវស្សា ទៅប្រគេនដល់ព្រះសង្ឃ នៅវត្តចំនួន២៩វត្ត ក្នុងស្រុកកណ្ដាលស្ទឹង

ខេត្តកណ្តាល៖ នាព្រឹកថ្ងៃទី៦ ខែកក្កដា ឆ្នាំ២០២០ ឯកឧត្ដម នៃ ចារី អភិបាលរងខេត្តកណ្ដាល និងលោកជំទាវ តំណាងឯកឧត្ដម គង់  សោភ័ណ្ឌ អភិបាលខេត្តកណ្ដាល ព្រមទាំង មន្ទីរអង្គភាពជុំវិញខេត្ត អាជ្ញាធរស្រុក មន្ត្រីរាជការ និងសហការី បាននាំយកនូវបរិក្ខារ ទេយ្យទាន បច្ច័យ ទៀនចំណាំព្រះវស្សា យកទៅប្រគេនដល់ព្រះសង្ឃដែលគង់ចាំព្រះវស្សាអស់កាល១ត្រីមាសនៅវត្តចំនួន២៩ ក្នុងកណ្ដាលស្ទឹង ខេត្តកណ្តាល ដែលពិធីនេះប្រារព្ធធ្វើនៅវត្តវិហារបិទមាស ។

ឯកឧត្ដម នៃ ចារី បានមានប្រសាសន៍ថា ព្រះពុទ្ធសាសនា គឺជាសាសនារបស់រដ្ឋ ដែលយើងទាំងអស់គ្នាមានជំនឿ និងគោរពប្រតិបត្តិតាម ព្រោះថាព្រះពុទ្ធសាសនា បានផ្តល់ការអប់រំផ្លូវចិត្ត ឲ្យប្រព្រឹត្តនូវអំពើល្អ និងចេះជួយយកអាសាគ្នា សាមគ្គីភាពគ្នា រស់នៅក្នុងសង្គមមួយដោយសុខដុមរមនា ។ 
       
ឯកឧត្តមបានបន្តថា នៅជារៀងរាល់ឆ្នាំ មិនថាពុទ្ធបរិស័ទ ឬសប្បុរសជននោះឡើយ សូម្បីតែអាជ្ញាធរខេត្ត តែងតែបាននាំយកនូវទៀនចំណាំព្រះវស្សាមកវេរប្រគេន ដល់ព្រះសង្ឃដែលគង់ចាំព្រះវស្សា នៅតាមទីវត្តអារាមនានាទូទាំងខេត្តកណ្តាល  ដែលនេះជាការបង្ហាញនូវការយកចិត្តទុកដាក់គាំទ្រ ផ្នែកវិស័យពុទ្ធសាសនា ដែលជាសាសនារបស់រដ្ឋផងដែរ ។

ក្នុងឱកាសនោះដែរ ឯកឧត្ដមភិបាលរងខេត្ត បានផ្ដាំផ្ញើដល់ មន្ត្រីរាជការ ព្រះសង្ឃ និងប្រជាពលរដ្ឋ មិនត្រូវមានការធ្វេសប្រហែស និងភ្លេចខ្លួន ក្នុងការការពារខ្លួន ពីជំងឺកូវីដ-១៩នោះឡើយ ត្រូវអនុវត្តន៍ឱ្យបានខ្ជាប់ ខ្ជួននូវវិធានការនានា តាមការណែនាំរបស់ក្រសួងសុខាភិបាល ដើម្បីការពារ និងទប់ស្កាត់នូវការឆ្លងរីករាលដាល នៃជំងឺកូវីដ-១៩ លេីកទី២។

សូមបញ្ជាក់ផងដែរថា តាមទំនៀមទម្លាប់ប្រពៃណីព្រះពុទ្ធសាសនា ពិធីបុណ្យចូលព្រះវស្សានេះ មានរយៈពេល៣ខែ ដោយចាប់ផ្ដើមពីថ្ងៃ១រោច ខែអាសាឍ ហើយបញ្ចប់ទៅវិញនៅថ្ងៃ១៥កើតខែអស្សុជ តាមព្រះវិន័យព្រះពុទ្ធសាសនា ដែលបានកំណត់ថា ព្រះសង្ឃមិនអាចនិមន្ត ចេញទៅបិណ្ឌបាត នៅខាងក្រៅឆ្ងាយៗវត្តបានឡើយ ដោយគង់នៅចាំព្រះវស្សា ក្នុងទីវត្តអារាម រហូតពេញអស់មួយត្រីមាសតែម្ដង ។ ដូច្នេះហើយទើបជារៀងរាល់ឆ្នាំ ប្រជាពលរដ្ឋ ពុទ្ធបរិស័ទ ក៏ដូចជាថ្នាក់ដឹកនាំគ្រប់ជាន់ថ្នាក់ តែងតែនាំគ្នាយកទៀន វស្សា និងទេយ្យវត្ថុ ទៅវេរប្រគេនព្រះសង្ឃមុនថ្ងៃចូលព្រះវស្សា ។

សម្ភារបរិក្ខាដែលបានប្រគេនព្រះសង្ឃ ដល់វត្តទាំង២៩វត្ត រួមមាន៖
បច្ច័យសម្រាប់ចង្ហាន់ព្រះសង្ឃចាំព្រះវស្សា ក្នុង១វត្ត បច្ច័យ ៤០ម៉ឺនរៀល .ទៀន១គូរ អង្ករ៥០គីឡូក្រាម និងស្លាដក១។
ដោយឡែកវត្តវិហារបិទមាស បច្ច័យ៦០ម៉ឺនរៀល អង្ករ២បាវ ទឹកផ្លែឈើ២កេស ទៀនវស្សា ១គូរ ស្លាកដក១ និងព្រះសង្ឃចំនួន៣៦អង្ឃ ក្នុង១អង្គ៤ម៉ឺនរៀល ព្រមទាំងយាយជី តាជី  និងពុទ្ធបរិស័ទចំណុះជើងវត្ត ចំនួន៧០នាក់ ក្នុង១នាក់ ថវិកា២ម៉ឺនរៀល។